今個聖誕　史上最荒失失嘅回鄉團再度出發
馬達加斯加 → 直航紐約 → 直插非洲
早機去　冇機返　一去無回頭

荒失失奇兵2 Madagascar 2
12月20日 唔荒走得甩

NO.1首選　保證成團

繼《功夫熊貓》後，夢工場最受歡迎動畫之一《荒失失奇兵》又再出發！首集全球票房超越5億美元，觀眾對續集萬分期待，籌備3年，台前幕後總動員多達500人，全新一集《荒失失奇兵》浩浩蕩蕩向非洲進發！

《荒失失奇兵2》早前在美國率先上映，即奪開畫票房NO.1，成績更超越首集的同期紀錄，可見今集故事肯定更精彩，製作更龐大、場面更震撼，笑料更抵死，絕對是今個聖誕的必睇動畫！

加遊「荒失失」海洋公園

有見上次《功夫熊貓》與海洋公園的crossover，大受歡迎，今次夢工場與海洋公園再度合作，將於聖誕期間在園內增設以《荒失失奇兵2》為主題的全新大型遊樂設施，加上「獅子亞力」和「企鵝隊長」亦會來港出巡與Fans見面，還有大型首映禮、商場活動，以及推出各式潮流商品，相信勢必掀起全城「荒失失」熱潮！

超爆笑精華遊

第1日 乘搭企鵝航空，沿途驚險百出，100%墜機保證！
第2日 直插非洲原始森林，與獅子阿力、斑馬馬提、河馬歌莉亞和長頸鹿邁文展開刺激大冒險！
第3日 自費參加企鵝詐死突襲遊客大行動
第4日 追蹤獅子阿力身世之謎，獅爸獅媽首度現身！
第5日 特別增設全新角色伴遊──性感型男河馬摩圖摩圖，與歌莉亞擦出愛火花！

上集講到獅子阿力、斑馬馬提、河馬歌莉亞和長頸鹿邁文，意外由紐約中央公園動物園走失，流落到馬達加斯加，於是佢地千方百計諗辦法返屋企。計仔多多的企鵝整好一部爛飛機，諗住送佢地一程，點知中途墜機跌落非洲大草原，身處危機四伏的原始森林，今次一班「荒失失奇兵」真係「唔荒走得甩」！

「荒失失」團員介紹

獅子亞力( Alex )
一向以「紐約之王」自居，最叻做騷，睇得跳得完全唔打得，今次一個唔覺意流落非洲，雖然好開心與失散多年的父母重逢，卻要面對最嚴峻的獅族考驗，與斑馬馬提的友情亦面臨反面危機……

斑馬馬提( Marty )
一直渴望尋根，終於俾佢恨到去非洲，初時見到一大班同鄉，興奮到唔停得口，點知一向以為自己獨一無二的他，日日被一式一樣的斑馬包圍，開始覺得好無癮，最離譜連老友亞力都睇唔出佢同其他斑馬有咩分別！

長頸鹿邁文( Melman )
一直暗戀河馬歌莉亞，今次遇上墜機意外，以為實死無生，終於大膽開口表白，點知……更意外的是，一向患有「周身病妄想症」的他，去到非洲，竟然成為備受尊崇的巫醫！？

河馬歌莉亞( Gloria )
甜美、爽朗，又自信，眼見自己咁好條件，自然心思思想拍拖，今次咁好彩跌落非洲，大把河馬任佢揀，終於遇上夢中情人，擦出愛火花！

河馬摩圖摩圖( Moto Moto )
非洲話「摩圖」解作火辣辣，疊字即係代表雙重火辣辣，係全非洲最性感的型男河馬，憑著一對粗眉、一嚿毛茸茸胸肌，同埋一把低沉磁性聲線，迷倒唔少女仔，包括初入情場的歌莉亞。

企鵝隊長( Skipper )
計仔多多、古惑抵死，統領3隻企鵝大發神威，主宰一班動物的生死，由修理飛機、到緊急墜機、到詐死突襲遊客大行動，全部一手包辦！

孤猴朱利安國王( King Julien )
扮鬼扮馬、最叻搞爛Gag的馬達加斯加大王，今次打算跟大隊出去紐約見識下，點知一個唔覺意流落非洲，決定順便拓展下自己嘅王國！

紅「聲」導遊　帶隊出發

鄭中基　聲演獅子亞力
帶病上陣　搏命超越上一集

今次鄭中基為《荒失失奇兵2》配音，再做同一角色，照計應該係 Easy Job，但實情是他比上一集更賣命、更辛苦，皆因他在配音前夕病倒了，初時大家都擔心他的病況會影響工作，不過他堅持帶病到場，而且一開咪就精神番晒，完全獅子亞力上身，直落一take過幾乎無須NG，可見他表現專業，連來自荷里活的配音總監也大讚他配得出色！

Ronald 更表示，今次再度演繹亞力，其實比上一集更高難度，「今集講佢同父母重逢，有溫馨親情戲，亦有唔少內心戲，有時演繹完激動到大叫大笑的場面後，又要平靜下來講啲感性對白，真係好考功夫！」所以大家今次除了可以欣賞到Ronald一貫的搞笑本色外，還可以看到他如何以不同聲線盡展演技，份外抵睇！

第1集《荒失失奇兵》在港叫好叫座，票房超越2千萬，Ronald 生鬼抵死的配音當然功不可沒，今次他對自己的表現更有信心，亦深信會比上一集更賣座，「今集個故事比上次更完整，笑位、動作場面都比上集多，而大家最鍾意的企鵝又加重咗戲份，仲有溫情線同愛情線，精彩咁多，梗係更收得！」

如果有《荒失失奇兵3》…
當然希望繼續由我扮演獅子亞力，今次不如講佢地「荒失失」來到香港，應該會有好多趣事！又或者俾我試下做企鵝，我好鍾意佢地，覺得我地嘅性格好相似，都係賤賤衰衰咁，哈哈！

最「荒失失」的旅遊經驗：
通常都係出外工作時發生，可能潛意識唔想做嘢啦，哈哈！最記得有次係去到機場 Check In 至發現自己唔記得帶 Passport，趕返屋企攞到 Passport，去到機場又發現自己無帶身份證，連續兩次真係好失敗！

方力申　聲演斑馬馬提
破紀錄　同場聲演300個角色

今次方力申好可能破了動畫配音史上一個新紀錄──一人同時聲演300個角色！話說今集講到斑馬馬提去到非洲，遇到幾百隻同鄉，個個同佢一式一樣，連講說話的聲音語氣都一模一樣，於是 Alex 就要一人聲演全部斑馬，「同一場戲有二、三百隻斑馬，個個都搭句咀，我要逐條聲配，用咗好長時間，配得好辛苦，但完成後的效果好得意，係我最鍾意又最難忘的場面！」

Alex 更表示，上集斑馬馬提這個角色深得觀眾喜愛，令他今次配音更有自信，「其實今次更嚴格、更認真，荷里活配音總監要求我做到好似原裝 Chris Rock 咁，密集式高低音抑揚頓挫的語氣聲調，講說話好似唱歌咁，用廣東話真係困難好多，但終於我都做到，覺得好有挑戰性、好有滿足感！」Alex 認為自己做得比上集更好，加上故事、角色更過癮，所以好有信心今次成績會超越上一集！

如果有《荒失失奇兵3》…
希望故事會講佢地去到南極，企鵝終於返到屋企，但咁冰天雪地，獅子、河馬能否適應？一班動物仲要著衫，著咩衫好呢？亦都希望有機會配下好奸嘅企鵝，因為平時演戲好少做奸角，演繹動畫有更多空間發揮，而且奸角又多人鍾意！

最「荒失失」的旅遊經驗：
十幾年前，去東京參加游水比賽，同班隊友逛街Shopping到忘形，發現自己唔見咗銀包，證件同錢都冇晒，即刻同隊友們好「荒失失」咁四圍去搵，好彩有位太太喺其中一間店舖執到我嘅銀包，仲喺度等我，交還俾我，果次真係嚇親！

田蕊妮　聲演河馬歌莉亞
性感甜美　狂冧周柏豪

田蕊妮今次比上集配得更開心，因為歌莉亞有拖拍，有愛情線，與她談情說愛的更是新晉型男周柏豪！「我今次用一把懶性感的聲線去演繹，見到呢對河馬雖然好肥，但對自己充滿自信，好Sexy咁去互相挑逗，呢啲場面真係好好笑，觀眾亦會覺得好有新鮮感！」毫無疑問，一向演技出色的阿田，自然做得好入戲，連對手周柏豪都大讚她的聲線「估唔到咁甜美」！

如果有《荒失失奇兵3》…
希望佢地去到法國啦，始終馬達加斯加、非洲都係原始荒野，呢班動物係時候去時裝之都見識下，培養下對潮流嘅觸覺，你想像下歌莉亞一身法國名牌時裝會幾好笑！

最「荒失失」的旅遊經驗：
我唔使去旅遊，平時已經夠晒「荒失失」啦！

周柏豪　聲演河馬摩圖摩圖
「溝女聲」演活性感河馬

首度為動畫配音的周柏豪，對於能夠加入「荒失失」大家庭，覺得好開心，而做到摩圖摩圖這個搞笑角色，更大感過癮！「摩圖摩圖係一隻好性感、身形魁梧、又鍾意撩女仔的河馬，我覺得同自己好似…」吓！原來他只是指自己身形大隻，為人亦比較感性這方面而已。

在演繹摩圖摩圖時，柏豪說他會用很低沉的聲線，製造性感挑逗的效果，即所謂的「溝女聲」，「講說話時，專登『窒住窒住』，懶有型咁，做到好骨痺，效果好爆笑！」柏豪在電影中更會性感演繹一首歌曲「我愛大嚿，我愛大大嚿」，十分搞笑搶耳，相信會令觀眾一聽難忘跟住唱，有望成為流行榜大熱！

其實柏豪這次為動畫首度配音，十分落力，早在大半年前已反覆為角色試音，而錄製歌曲時，除唱主音外，更親自唱埋和音，務求效果做到最好，非常投入和認真，難怪他能在新一代歌手中突圍而出！

如果有《荒失失奇兵3》…
我希望劇情發展到講佢地生兒育女，加入獅子BB、河馬BB等新角色；又或者第3集由真人演繹，演員們著上動物戲服，應該幾搞笑！

最「荒失失」的旅遊經驗：
早排同媽咪去日本旅行，完全無計劃行程，去到邊玩到邊食到邊，都幾趕頭趕命，最後一分鐘至趕到去機場返香港，整個旅程都好「荒失失」！

I Love You Boyz：Donald 聲演企鵝隊長、少爺占聲演狐猴朱利安國王
Donald 笑騎騎　阿占狂NG

上集《荒失失奇兵》，企鵝四人幫非常搶鏡，今集加重戲份，所以亦特別找來搞笑最強的 Donald 聲演企鵝隊長。Donald 演繹這個角色當然無難度，完全做出企鵝賤賤衰衰的特色，堪稱「人鵝合一」！

反而配音無數的少爺占，今次就吃盡苦頭，話說阿占把聲與原裝的朱利安國王大有分別，夢工場卻要求全世界的配音者都要盡量接近原聲，所以阿占唯有全程玩變聲，荷里活配音總監亦十分緊張，要求他重錄又重錄，一句對白錄足一粒鐘，阿占笑稱這個紀錄前所未有，大家今次可以欣賞到全新風格的少爺占！

此外，I Love You Boyz 的電台節目「萬世巨星」更與《荒失失奇兵2》破天荒合作，在電台公開招募「荒失失奇聲」，由周柏豪和阿喱擔任評判，勝出者有份參與配音，聲演其中一隻非洲長頸鹿，好玩又開心！

MC Jin 沿途陪你「周身郁扭左扭右」

由 Black Eyed Peas 的 will.i.am 主唱的《荒失失奇兵2》電影主題曲「I Like to Move It」，在美國唱到街知巷聞無人不識，為令香港觀眾更有親切感，電影公司特別邀請人氣歌手 MC Jin 填詞及主唱粵語版！

MC Jin 接獲邀請，非常興奮，皆因他本身是 Black Eyed Peas 的歌迷，能與偶像 will.i.am 同唱一曲，十分難得，於是一口答應立即開工填詞，不過完全不懂得讀寫中文的他，靈感閃現就要找母親幫手寫下歌詞。之後還要把歌詞錄音，以便自己不停翻聽，背熟歌詞，才正式錄音。

這首本地版主題曲由陳光榮擔任監製，不少人聽過後都大讚歌詞地道惹笑，自自然然就會跟住 MC Jin 又唱又Rap「周身郁扭左扭右，一齊嚟郁下！」稍後歌曲和 MV 將會在戲院、網路、電台、戶外電視等熱播，相信會成為今年最Hit的電誕歌！

點入觀看《荒失失奇兵2》粵語版主題曲MV！

「荒失失」回鄉團8大特色
獨一無二‧國際認可

1. 《荒失失奇兵2》原裝英語版的聲演陣容同樣強勁，原班人馬星級回歸，包括《翻生侏羅館》賓史迪拿( Ben Stiller )、黑人搞笑巨星基斯洛克( Chris Rock )、《老友記》大衛舒溫瑪( David Schwimmer )、《廿二世紀殺人網絡》珍達娉琦史密夫( Jada Pinkett Smith )、《波叔出城》沙格畢朗伯肯( Sacha Baron Cohen )、will.i.am 等，「聲」光熠熠！
2. 今集有時光倒流回憶片段，觀眾會見到童年時的獅子亞力、斑馬馬提、河馬歌莉亞等，於是亦順理成章找來賓史迪拿的乖仔 Quinlan 聲演細路亞力，雖然主力都是收錄了他的哭喊聲。至於小河馬，理想人選當然是珍達娉琦史密夫與韋史密夫的乖女 Willow。
3. will.i.am 對摩圖摩圖這個角色十分喜愛，打算與他簽約，成為他唱片公司旗下的藝人！
4. 為了真實呈現非洲大地的震撼景致，幕後人員從網上、書本、電影、圖片進行了大量資料搜集，不過夢工場CEO謝菲卡辛堡( Jeffrey Katzenberg )認為這是不足夠的，於是把一大隊前線創作人員送去非洲，參加野生動物園旅遊團，實地考察，難怪現在大銀幕所見的非洲幾可亂真！
5. 今集總共創作了4635個角色，包括19種不同品種的動物和人類。最大場面有多達7183個角色同場出現！一幕接一幕的大場面，最困難當然是「群眾處理」( Crowd Control )，即是每一隻動物、每一個角色都要有自己的表情和動作，這樣才能做出生動的效果。而為了令到幾位動物主角在一大群動物中突圍而出，尤其是本來應該一式一樣的斑馬，製作人員特別為斑馬馬提打燈調光色調，其他斑馬就為牠們加點泥沙塵埃，以免搶了主角的風頭。
6. 在創作重頭戲「墜機場面」時，製作人員特意把自己綁在倒置了的梳化上，還用搖動的鏡頭，記錄不同的畫面和角度，再研究加上各種特技效果，務求令「墜機場面」更真實、更震撼。基本上，在這場重頭戲中，每格畫面平均用上15至30種特技效果，包括風吹、爆炸、高速下墜、動物毛髮飛揚等，難怪單是一個鏡頭也要花上6星期處理！
7. 電腦特技精益求精，愈做愈精細，今集單是一格畫面也要用上12小時作電腦運算處理，整部電影就花上了1千2百萬小時，而後期處理更長達3千萬小時！
8. 力求完美，《荒失失奇兵2》不惜工本請來《魔間迷宮》金像攝影 Guillermo Navarro，擔任攝影指導，務求將真人電影的視野、動感和震撼影像融入動畫，為觀眾展示非一般的動畫大製作！

今個聖誕，史上最荒失失回鄉團再度出發！獅子阿力、斑馬馬提、河馬歌莉亞、長頸鹿邁文、企鵝隊長、孤猴朱利安國王及新加入角色河馬摩圖摩圖，嚟到香港當然唔少得一班本地藝人出聲出力帶隊捧場。唔知各位打算觀看《荒失失奇兵2》( Madagascar: Escape 2 Africa )英文版定係粵語配音版呢？

英文配音：
賓史迪拿 Ben Stiller 聲演 獅子亞力
基斯洛克 Chris Rock 聲演 斑馬馬提
珍達娉琦史密夫 Jada Pinkett Smith 聲演 河馬歌莉亞
大衛舒溫瑪 David Schwimmer 聲演 長頸鹿邁文
will.i.am 聲演 河馬摩圖摩圖
沙格畢朗伯肯 Sacha Baron Cohen 聲演 狐猴朱利安國王

粵語配音：
鄭中基 聲演 獅子亞力
方力申 聲演 斑馬馬提
田蕊妮 聲演 河馬歌莉亞
周柏豪 聲演 河馬摩圖摩圖
I Love You Boyz：
Donald 聲演 企鵝隊長
少爺占 聲演 狐猴朱利安國王

《荒失失奇兵2》香港上映日期：2008年12月20日。

Black Eyed Peas 成員 will.i.am 主唱《荒失失奇兵》( Madagascar )兩集主題曲「I Like To Move It」，在美國街知巷聞無人唔識。電影公司為令香港觀眾更有親切感，邀請人氣歌手歐陽靖( MC Jin )填詞及主唱粵語版。MC Jin「rap」英文幾勁，但填中文詞就……可能只係我唔識欣賞啦！

《荒失失奇兵2》香港上映日期：2008年12月20日。

洲立影片及荷里活電影手冊現送出夢工場動畫《荒失失奇兵2》( Madagascar: Escape 2 Africa )20張優先場戲票，同獅子、斑馬、河馬、長頸鹿、企鵝等一班動物朋友「荒失失」闖入非洲大草原！

日期：2008年12月14日（星期日）
時間：10:00 am
戲院：MCL 康怡戲院

若有意索取，請即填妥以下資料，並於12月8日前以電郵方式傳送至：enter@moviesoonhk.com。

郵件主旨：《荒失失奇兵2》優先場戲票
a) 姓名
b) 聯絡電話
c) 郵政地址
d) 電郵

10位得獎者將獲電郵或電話通知。

注意：此活動只限於香港地區。個人資料只會用作抽獎及郵寄獎品之事宜。

《荒失失奇兵2》香港上映日期：2008年12月20日。

夢工場動畫《荒失失奇兵》( Madagascar )最具人氣嘅唔係獅子、斑馬、河馬、長頸鹿四位主角，而係身懷絕技嘅企鵝特工隊！呢班「詭計多端」嘅企鵝仔今集仲好嘢，唔單只學人揸飛機，仲大玩「苦肉計」徒手劫車，不得不寫個「服」字！

雙擊電影片段可選擇「以高品質觀看」。Enjoy!

《荒失失奇兵2》香港上映日期：2008年12月20日。

睇過夢工場動畫《荒失失奇兵2》( Madagascar: Escape 2 Africa )最新預告，覺得今集嘅笑位好似好過上集喎！非洲叢林動物對抗人類狩獵者，條橋都算okay，但願故事水準不會太差。

下載：480p HD | 720p HD | 1080p HD

《荒失失奇兵2》香港上映日期：2008年12月20日。

夢工場動畫《荒失失奇兵》( Madagascar )我自己就覺得麻麻，唔知點解票房咁賣得，仲拍埋續集添！《荒失失奇兵2》( Madagascar: Escape 2 Africa )近日正式曝光首條電影預告及宣傳海報，希望好過前作少少啦！

下載：480p HD | 720p HD | 1080p HD

另外，《荒失失奇兵》DVD都收錄有一條《荒失失奇兵2》電影宣傳片段，聲演獅子 Alex 嘅荷里活笑匠賓史迪拿( Ben Stiller )現身其中介紹續集劇情。大家有冇留意到早前英文片名同而家有D唔同？

《荒失失奇兵2》香港上畫日期：2008年12月20日。