「小布殊」登上《娛樂周刊》封面!

《Entertainment Weekly》最新一期封面人物係——美國總統喬治布殊( George W. Bush )伉儷?呢幅相其實係祖舒布倫( Josh Brolin )同伊莉莎伯班絲( Elizabeth Banks )演出奧利華史東( Oliver Stone )導演小布殊傳記片《W》嘅官方角色造型照。

《W》一定唔係奧利華史東首齣爭議之作,唔係佢首齣傳記片,甚至唔係佢首次涉足總統題材,但一定係佢首齣喜劇。

奧利華史東拍過美國總統尼克遜( Richard M. Nixon )生平,拍過調查甘迺迪遇刺案《JFK》,但今次嘅《W》「零捨不同」D嚄!奧利華史東話「布殊好搞笑」,因為薯仔總統夠搞笑,所以「套戲仲搞笑」。

「佢既笨拙又愚蠢,整日嘁眉弄眼,絕非一位大家通常見到嘅總統。所以我哋都不妨玩吓嘢。」史東接受《Entertainment Weekly》訪問時表示。

史東形容布殊嘅人生就好似一齣「法蘭卡普拉( Frank Capra )執導嘅笑片」——一個冇幾多才華嘅人不斷出賣自己。

不過布殊都有D嘢令到史東對佢肅然起敬,「佢曾經生活喺父親同家族名望嘅陰影之下,但最終行咗出來,你不得不佩服佢嘅堅韌執著。」

由於電影題材敏感,荷里活各大片商都唔肯出錢拍攝,最後史東借助獨立製作融資渠道,北美發行商 Lionsgate 已宣佈《W》將於2008年10月17日上映,距離11月4日美國總統大選投票日只有兩個幾星期嘅時間。

除咗早前公佈嘅布殊家族演出陣容,仲有兩位同布殊關係密切嘅風雲人物已經「名角有主」:

「職業特工隊2」丹迪紐頓( Thandie Newton ) - 美國國務卿賴斯

「神奇四俠」伊奧安古列福( Ioan Gruffudd ) - 英國前首相貝理雅

另外,副總統切尼( Dick Cheney )、前國防部長拉姆斯菲爾德( Donald Rumsfeld )、布殊前高級顧問羅夫( Karl Rove )等白宮群英都會「現身」。

Related posts

2 thoughts on “「小布殊」登上《娛樂周刊》封面!”

Leave a Reply