費迪夏摩亞聲演《阿童木》大電影

監製 Maryann Garger 及導演 David Bowers 宣佈，費迪夏摩亞( Freddie Highmore )即將聲演香港本地電影動畫公司意馬國際( IMAGI )2009年度力作《阿童木》( Astro Boy )！

費迪夏摩亞將為戲中主角小飛俠配音。《阿童木》大電影都係佢繼《史柏力魔怪書》( The Spiderwick Chronicles )參演又一矚目之作。

導演 David Bowers 表示：「費迪應承演出《阿童木》實在令人振奮。佢係演技精湛嘅年輕演員，感覺清新並充滿活力，十分適合擔任小飛俠一角。《阿童木》係受人愛戴嘅超級英雄，過去五十年感動咗無數人。我迫不及待想睇佢點樣去演活小飛俠。」

費迪2月14日情人節啱啱度過十六歲生日。佢曾經同添布頓、烈尼史葛和洛比桑等多位大導演合作，亦與尊尼特普、琦溫斯莉、德斯汀荷夫曼、羅素高爾、羅賓威廉斯等巨星演出對手戲。費迪參演作品包括《魔幻羅盤》、《聲夢奇緣》、《阿瑟的奇幻王國》、 《美好的一年》、 《朱古力掌門人》及《小飛俠前傳之魔幻童心》。

「漫畫大師」手塚治虫名作《阿童木》，喺世界各地都深受歡迎。60年代首度推出電視動畫，60年代及2003年推出重新製作嘅動畫劇集。

科幻動畫電影《阿童木》故事背景設於未來世界嘅 Metro City ，講述一位出色科學家製造出擁有強大力量嘅年輕機械人小飛俠阿童木，以慰喪子之痛，但科學家冇因為小飛俠而解開心結。阿童木於是踏上旅程，尋求人類社會接納，經歷被人出賣、同其他機械人格鬥，最終拯救咗 Metro City，並與拋棄佢嘅科學家和好。

《阿童木》香港上映日期：2009年10月8日。