尊古錫、鞏俐、渡邊謙新片《上海》遭內地禁拍

中國廣播電影電視總局近排拒絕咗雲士頓影片( The Weinstein Company )喺上海拍攝尊古錫( John Cusack )、鞏俐、渡邊謙( Ken Watanabe )主演二戰影片《上海》( Shanghai )嘅申請。

瑞典導演米高希夫斯敦( Mikael Hafstrom )接受傳媒訪問時表示,廣電總局嘅決定令佢哋感到驚訝,「假若我哋冇百分百把握,係唔會喺度投入大量預算嘅。」《上海》製作組去年9月就來到中國籌備拍攝工作。

「雖然只係猜測,不過他們或者認為呢套戲扭曲咗中國形象。」《上海》有部分劇情反映上海日治時期鴉片汎濫及性服務行业。

《色,戒》和《蘋果》挑戰審查尺度嘅爭議性內容引發國內觀眾熱烈討論,隨後廣電總局發出《關於重申禁止製作和播映色情電影的通知》。雖然官方並沒有解釋奪得威尼斯影展「金獅獎」嘅《色,戒》是否屬於「色情電影」,但毫無疑問,再有同類影片獲准喺國內拍攝已經係「Mission Impossible」。

有傳聞話,廣電總局拒絕雲士頓影片,係因為買咗《無極》北美發行權嘅雲士頓影片上畫前突然宣布撤片,後來 Warner Indepedent Pictures 臨時接手,最終都係票房慘淡收場。但由於先後有5到6部外國電影申請被拒,所以好難話是否有受此因素影響。

雖然雲士頓影片高層仍冀望於廣電總局轉變態度,但導演米高希夫斯敦話佢哋已決定轉移到香港拍攝。《上海》製作組好有可能會book低將軍澳邵氏影城,同時計劃喺香港、澳門及其他地區拍攝外景。

除了尊古錫、鞏俐同啱啱簽約嘅渡邊謙,片商仲力邀香港影星周潤發加盟。導演米高希夫斯敦前作《1408》就搵咗尊古錫擔任主演,定於2009年上映嘅《上海》係佢哋第二次攜手合作。

Related posts

One thought on “尊古錫、鞏俐、渡邊謙新片《上海》遭內地禁拍”

Leave a Reply