《哈利波特7》拍上下集？

 

雖然而家仲拍緊《哈利波特6》( Harry Potter and the Half-blood Prince )，但各種關於第七集電影嘅傳聞已陸續「出街」。英國《The Daily Mail》最近爆料話：參與《哈利波特6》製作嘅工作人員收到風，《哈利波特7》將會拆開兩集上畫！

片廠作此決策當然同票房有關（收多至少8億美金），但報導指出，華納影片主要考慮到影片的藝術創作。知情人士表示：「最尾一集《哈利波特》分成兩part嘅原因有好多，表現哈利同佛地魔的決戰亦需要多D時間同空間。」

報導同時透露，華納而家請緊D知名導演加盟《哈利波特7》——包括有史提芬史匹堡( Steven Spielberg )，甚至計劃進軍奧斯卡！原著作者 J.K.Rowing 之前都話過華納有聯絡史匹堡拍《哈利波特》第一集，但史匹堡當時拒絕咗佢哋。

而家傳聞執導《哈利波特7》嘅，仲有第三集導演艾方素卡朗( Alfonso Cuarόn )，第五、六集導演大衛葉斯( David Yates )，第一、二集導演基斯哥斯布( Chris Columbus )，同埋呼聲最高嘅吉拿域戴拖路( Guillermo del Toro )。

吉拿域戴拖路最近接受MTV訪問時表示：「我的確有興趣執導《哈利波特7》。整套戲已經黑暗咗好多。D青少年角色慢慢發覺所面對嘅現實世界充滿陰暗面……我睇咗《哈利波特7》小說，最尾令我好感動，個結局幾有狄更斯作品feel。」

《哈利波特3》曾考慮請吉拿域戴拖路擔任導演，不過佢向華納大力推薦好友艾方素卡朗，於是艾方素卡朗執導咗「哈利波特」系列評價最高嘅一集。