「佛羅多」伊利亞活透露「魔戒前傳」最新進展

我哋之前報導話彼德積遜( Peter Jackson )將返歸「魔戒」( The Lord of the Rings )為兩部「哈比人」前傳擔任監製。大家一直以為 New Line Cinema 同 MGM 計劃將《哈比人歷險記》( The Hobbit )「斬」開兩集,但「佛羅多」伊利亞活( Elijah Wood )近日接受MTV訪問時又話唔係咁喎!

伊利亞活表示:「雖然我未同彼德積遜有面對面傾過,但我哋都有透過電郵保持聯絡嘅。据我所知,其中一套就係《哈比人歷險記》啦,另外一套係講述《哈比人歷險記》同《魔戒》之間六十年發生嘅事情。」

咁佛羅多同阿拉岡係唔係都有機會喺第二集出現呢?「假若導演希望我返嚟繼續扮佛羅多,我當然願意啦!」

你睇過《哈比人歷險記》原著就會發現,呢本小說其實內容唔係咁多,改編成兩齣三個幾鐘嘅電影的確好有難度。拍《哈比人歷險記》同《魔戒》之間嘅「過場戲」聽落都幾吸引……但一個脫離原著作者托爾金嘅原創故事又能否滿足到班「魔戒」fans?

《哈比人歷險記》同另外一集「魔戒前傳」計劃於2010年12月、2011年12月全球上畫。

Related posts

Leave a Reply