2008年「金球獎」頒獎禮就咁取消咗

 

荷里活外國記者協會( Hollywood Foreign Press Association )本週一正式宣布,由於編劇工會同演員工會嘅聯合抵制,原定於1月13日舉行嘅第65屆「金球獎」( Golden Globe Awards )頒獎禮被迫取消,改為1個鐘嘅電視新聞節目。

NBC新聞頻道將於太平洋時間1月13日晚上六點(香港時間1月14日早上10點)直播呢檔「第65屆金球獎」電視節目,現場揭曉全部25個獎項嘅最終結果。

美國編劇工會從去年11月開始罷工,至今已經延續咗2個幾月嘅時間。由於呢排係一年一度電影頒獎季,眾多獎項因此受到牽連。去年12月編劇工會拒絕咗金球獎、金像獎提出「准許編劇為其撰稿」嘅請求,之後還話要喺金球獎舉辦場地門外設置「封鎖線」。一直支持編劇罷工嘅演員工會立即聲言杯葛金球獎頒獎禮。

金球獎頒獎典禮取消,好容易令人聯想到即將於2月24日舉行嘅奧斯卡金像獎頒獎禮。今年啱啱好係金像獎80周年紀念,主辦方當然不會放棄一個咁難得嘅機會,但「星光黯淡」嘅頒獎禮恐怕得「冷場」兩隻字嚄。

不過,湯告魯斯( Tom Cruise )同寶娜韋納( Paula Wagner )負責運作嘅獨立片厰 United Artists 已經同編劇工會率先達成復工協議,解決咗包括新傳媒收入拆賬等關鍵問題——而CBS清談節目《大衛牙擦騷》( Late Show with David Letterman )一早就同編劇工會「傾掂數」。但 United Artists 母公司美高梅( MGM )似乎並不認同 UA 嘅做法。

Related posts

Leave a Reply