《Juno少女孕記》創意影片開場動畫!

當你望住「Juno」,腦海中開始浮現「麥浚龍」……停!呢個諗法一定要戒!因為《Juno少女孕記》今時今日喺美國已成為獲獎無數、好評滿分、劇本睿智、對白精警嘅喜劇代表作,而電影中總係忽發奇想,開口埋口夭心夭肺嘅16歲大肚妹 Juno,更已成為最具時代意義嘅潮流 icon,你一定要識!美國電影頒獎禮季節一開始,《Juno少女孕記》已獲獎無數,至今「笑奪」超過30個重量級獎項,更有望揚威金球獎同奧斯卡!

套戲真係咁正?睇吓開場字幕動畫先喇!導演積遜列文( Jason Reitman )搵番早前合作《吸煙無罪》( Thank You for Smoking )的設計團隊 Shadowplay Studio,令飾演 Juno 的愛倫比芝( Ellen Page )行走於真實與手繪世界之間,趣怪又清新!

同場加映 Shadowplay Studio 幾年前為《吸煙無罪》製作的片頭動畫,都幾正!

純屬好奇,但求就手,16歲少女 Juno 隨意搵來騎呢男生初嘗性滋味,點知就咁搞大咗!對住面青青嘅父母、眼光光嘅經手人,Juno唯有自行「放盤」,透過分類廣告為腹中塊肉尋找一主好人家!就咁,Juno 將一眾身邊人拖晒落水,集體經歷懷胎十月,共同感受產前各種突如其來的失調、作動與陣痛……這段少女「孕」記離奇荒誕、哭笑難分,肯定一世難忘!

《Juno少女孕記》香港上畫日期:2008年2月21日。

Related posts

Leave a Reply