妮歌潔曼+曉治積曼《澳大利亞》最新電影劇照

《情陷紅磨坊》( Moulin Rough )導演巴茲雷曼( Baz Luhrmann )執導，澳洲影星妮歌潔曼( Nicole Kidman )、曉治積曼( Hugh Jackman )主演澳洲二戰版《亂世佳人》——《澳大利亞》( Australia )今個月19號已經正式殺青。二十世紀霍士影片隨即發佈《Australia》4幅最新官方電影劇照！

製作預算超逾1億美金嘅《Australia》今年4月底喺雪梨開拍，之後前往 Bowen、Darwin 等地取景，拍攝過程長達9個月。殺青在即，妮歌潔曼同曉治積曼兩位主演嘅心情都十分複雜——特別係妮歌潔曼，佢同巴茲雷曼用咗足足7年時間籌劃呢齣電影。

拍攝結束當日妮歌向記者透露：「我尋晚喺夢中哭咗，可能係因為電影殺青令我感到有少少失落。好高興拍咗呢套戲，我14歲就諗著做D咁嘅嘢。雖然個諗法好模糊，不過我一直都keep著呢個夢想。」

《Australia》故事發生喺二戰前夕嘅澳洲北部，妮歌潔曼飾演嘅英國女貴族繼承咗一個好似美國馬里蘭州咁大嘅農場，不過佢塊地又畀養牛大亨睇啱咗。逼不得已之下，妮歌潔曼同曉治積曼飾演嘅「cowboy」趕著2000頭牛穿過澳洲中部幾百公里嘅荒漠，間中仲要面臨日本人對 Darwin 嘅狂轟濫炸。