《魔間傳奇》銅鑼灣時代廣場亞洲首映禮

《魔間傳奇》( I Am Legend )主演韋史密夫( Will Smith )、導演法蘭西斯羅倫斯( Francis Lawrence )同埋編劇兼監製艾基法高士文( Akiva Goldsman )今次香港宣傳行程中都包括咗開放畀公眾參與嘅亞洲首映禮,雖然我哋知道公眾活動經常都係「吃力不討好」,不過仍然都有唔少影迷12月8日晚上專程前往銅鑼灣時代廣場一睹巨星風采。

But,主辦方嘅場地佈置有D「怪異」,紅地毯嘅位置係靠喺時代廣場建築物內側,同出邊嘅行人道之間隔著個大大嘅記者席。場外等候嘅影迷睇嚟只能「可望而不可及」,的確令人感到小小遺憾。

從傍晚6點鐘開始,開始見到有收到消息嘅影迷到鐵馬出邊「霸位」,有幾位仲特登帶咗攞韋史密夫做封面嘅雜誌到現場索取簽名。不過似乎大部分都係外國fans,唔通韋史密夫本地觀眾人氣不佳?

站咗兩個幾鐘,陸續有明星嘉賓行經紅地毯。等到我面前嘅嘉賓席「人頭湧湧」,主持人終於正式宣布亞洲首映禮開幕。艾基法高士文同法蘭西斯羅倫斯當然要先出場。我估唔到主持人介紹高士文係《有你終身美麗》( A Beautiful Mind )編劇都幾多人鼓掌架!

當然,大家最期待見到嘅都係韋史密夫!於是主持人請大家一齊大喊"Will Smith! Will Smith!"將他請上台。韋史密夫一出現,整個時代廣場都被歡呼聲所震動。史密夫仲覺得未夠「勁」:「畀我聽到你哋D尖叫聲!」全場一呼百應之勢,加上史密夫現場大玩「rap」(其實韋史密夫最早係singer出身嘅),可能會被D路人以為係某位歌星嘅live show!

今次《魔間傳奇》亞洲首映禮又玩咗遞D傳統表演項目——打鼓。本地舞獅團先做咗一次示範表演,而韋史密夫就喺後邊跟著打拍。然後主持人話,「史密夫先生,係時候睇你開show了!」韋史密夫先係故作驚訝,不過好快就接過鼓棒,喺舞獅團成員嘅協助之下都幾「似模似樣」。

仲未完,緊接著韋史密夫就「邀請」艾基法高士文、法蘭西斯羅倫斯齊齊擊鼓,最尾仲還要加多個踢腿動作。orz...

鼓聲一停,舞台上就綻放出耀眼嘅火花,無數彩帶從空中飄落到人群之中,精心佈置嘅時代廣場聖誕裝飾都同時亮燈!簡短嘅亞洲首映禮活動就咁落下帷幕。

身邊仲有好多外國電視記者對著鏡頭難以掩飾興奮之情。最「巔」嘅就係D泰國記者,喺首映禮現場又叫又跳。不過今次泰國幾間傳媒似乎派咗頗為之強大嘅報導陣容,甚至連華納泰國都有同事隨團來港,由此可見係幾咁重視。

最尾影番張亮燈后嘅時代廣場聖誕裝飾,喺度預祝大家聖誕快樂!

Update:  多謝華納影片提供《魔間傳奇》時代廣場香港首映禮現場影片!

《魔間傳奇》即將于2007年12月13日在香港上畫! 

特別鳴謝:Warner Bros. (F.E.) Inc.

Related posts

One thought on “《魔間傳奇》銅鑼灣時代廣場亞洲首映禮”

Leave a Reply