《天使與魔鬼》受美國編劇罷工影響推遲上畫

新力影片( Sony Pictures Entertainment )製作《天使與魔鬼》( Angels & Demons )不幸成為首個受到美國編劇罷工影響而推遲上畫嘅荷里活大製作。

同2006年劣評如潮不過都幾賣得嘅《達文西密碼》( The Da Vinci Code )一樣,前傳《天使與魔鬼》都係由朗侯活( Ron Howard )執導,湯漢斯( Tom Hanks )主演。之前有報道話,編劇阿基華高士文( Akiva Goldsman )快馬加鞭喺編劇工會罷工之前趕晒劇本,不過而家睇嚟都係出咗問題。何況出片除咗湯漢斯之外,其他角色仲未有著落。

所以新力上周五宣佈《天使與魔鬼》將推遲上畫,從2008年12月推到2009年暑期。原定于明年2月嘅開拍日期估都要TBA了。

新力影片發言人透露,佢哋同製作單位都覺得個劇本幾唔錯,不過佢哋就擔心拍攝期間可能需要調整劇本而搵唔到編劇,考慮到保證影片質素先至做出呢個決定。

新力表示,《天使與魔鬼》新嘅上畫日期係2009年5月15號,而且佢哋唔希望新力2008年發行嘅其他影片都會受到罷工的影響。

美國編劇工會嘅罷工目前已經進行咗12日。就係今日,電影電視製作人聯合會同埋編劇工會聯合發表聯合聲明,表示佢哋將於11月26號恢復雙方談判。稍後編劇工會西部主席 Patric Verrone 發送電郵畀所有成員,讚揚佢哋呢幾日嘅罷工行為。佢話,罷工越徹底,罷工持續嘅時間就越短。雖然恢復談判係一個好消息(說明佢哋嘅行動終於有所成效),不過「罷工尚未成功,編劇仍需努力」,罷工最終嘅目的就係要換到一紙公平嘅合約。

Related posts

2 thoughts on “《天使與魔鬼》受美國編劇罷工影響推遲上畫”

Leave a Reply