添布頓+尊尼特普之《魔街理髮師》最新海報劇照！
今年年底明年年初喺全球上映的添布頓( Tim Burton )最新驚慄力作《魔街理髮師》( Sweeney Todd: The Demon Barber of Fleet Street )最近發佈咗全新電影海報以及多款官方劇照！
「魔盜王」尊尼特普( Johnny Depp )主演呢部改編自同名音樂舞臺劇嘅驚慄片講述咗一個幾另類嘅故事：一位擁有幸福家庭嘅男人被阿倫力文( Alan Rickman )扮演嘅邪惡官員迫害入獄，最終搞到妻離子散人間悲劇。呢位無辜人士出獄之後改名轉姓發誓報復，於是重新開咗間髮廊接待顧客，不過好似就冇人可以從間店度行返出來啵。唔係因為尊尼特普識「時空轉移大法」，而是個個都被佢同埋海倫娜寶咸卡達( Helena Bonham Carter )飾演嘅添布頓版「孙二娘」整咗「人肉pie」。除咗佢哋三位，入邊仲出現咗「波叔」沙格畢朗高漢 ( Sacha Baron Cohen )同埋喺《哈利波特3》( Harry Potter and the Prisoner of Azkaban )「扮老鼠」嘅提摩菲史樸爾( Timothy Spall )。
之前已經有消息話，《魔街理髮師》海外發行商華納影片( Warner Bros. Pictures )覺得尊尼特普飾演嘅殺人理髮師過於變態，要求導演添布頓刪改。據說華納高層對其中一個10歲嘅細路被人肢解然後扔落絞肉機嘅場景感到極為不安。不過我哋就未知香港公映版本有冇經過導演刪減（剪唔剪都估係三級啦）。
PS，《魔街理髮師》已經定于2008年1月31號喺香港上映。
Related posts
Posted by ADAM on Sunday, November 11th, 2007 at 6:57 pm.
